إنجازات ليبية

ان منتخب ليبيا صاحب اسرع ردة فعل في تاريخ الكرة على هدف يدخل مرماه
وجاب هدف كذب للمليون من نص الملعب للزنتاني
حاجة خيالية من متاعات الكابتن ماجد
المهم قلت أنا صح ليبيا بلاد صغيرة وماعندناش بطولات لكن بصراحة من قال ليبيا ياتي الجديد
ما كذبش وخود عندك
أكبر عدد من الاهداف ليبيا وعمان 21 -0
ولا وانسحبوا العمانين احتجاجا على ريقولي
على اساس فرقت 21 ولا 22
وعمك بن سويد 9 اهداف مايديرها الا ليبي ولو لعب الريقولي راهو 10 باهي

وأمسك عندك
أول دوري ممتاز في العالم يوصل عدد فرقه ل31 فريق
أول دوري درجة تانية يوصل فيه عدد الفرق ل47 فريق
أول لاعب عربي يسجل في فريقين فازوا بكاس العالم من هو؟
اكيد ليبي البلاوي.. هذين تبي ليبين.. "البرنس طارق التايب" سجل على الارجنتين والارجواي ومزال البرازيل

حتى أعلى درجة حرارة في التاريخ عندنا في العزيزية 58 درجة مئوية في الظل أخرى
تريتك مش ساهل يا اريستو
باهي امسك عندك
أول كاس افريقيا يشارك فيها محترفين في ليبيا
أول كاس افريقيا على العشب الصناعي في ليبيا
أول كاس يحسم بركلات الترجيح في ليبيا
أول فريق مايخسرش وماياخدش الكاس ليبيا
لا وشنو خشوا عالمحركات أخرى
أول سباق فورملا ون يندار في دولة عربية كان في ليبيا للترفيه عن الجنود الطليان في هذك الوقت
بس ماعندنش بخت يا ايرستو
المهم شد عندك
أول جماهيرية في التاريخ ليبيا
أول نهر صناعي في ليبيا
أول من استعمل الطائرات في الحرب وادخل الدبابة للصحراء في ليبيا
وأول دولة أعتذر منها الإستعمار هي ليبيا
أطول شاطي في المتوسط في ليبيا
آخر مباراة في القرن العشرين والألفية الثانية في ليبيا
أول مباراة في القرن ال21 والألفية الثالثة في ليبيا
طبعا الفقرة ماقبل الاخيرة تخص الشوط الاول من مباراة ليبيا وغانا في دورة النهر في بنغازي والي بعدها تخص الشوط التاني من نفس المبارة
باهي من أول لاعب سجل في الالفية الثالثة أكيد ليبي قلنالكم بلاوي نحنا
جيجو - جهاد المنتصر سجل بعد دقيقتين من دخول سنة 2000 - في رمضان
المهم أكيد طولت عليكم بس نقدر نكتب للصبح أصلا كل جديد وراه ليبي
زي أول ثورة للعبيد دارها ليبي سبارتكوس

شنو نبوا انعد ولا انعد
أول بلاد عربية يزورها بيليه وماردونا وباتيستوتا
التحنيط أول مره اكتشفوه في ليبيا قبل حضارة الفراعنه بألف سنه..
هذا مش من عندي . هذا كلام ديسكوفري
وفي آخر مره انكسفت الشمس كان أفضل مكان في العالم للرؤيا الواضحه و المتكاملة كانت ليبيا
و بالذات في منطقه اسمها واو الناموس
أول سوبر ايطالي في افريقيا والدول العربية في ليبيا
أول مرة الارجنتين تلعب في افريقيا في ليبيا
أول مرة تلعب المكسيك في افريقيا في ليبيا
أول مرة تلعب كندا في افريقيا في ليبيا
أول فريق ينسحب من نهائي افريقي من ليبيا
وليبيا أول دولة تعلن الحرب على امريكا في بداية تأسيس الولايات المتحدة.. لا وأسرنا سفينة فيلادلفيا واستسلم كل البحارة على متنها

أول رحلة الى مجاهل أفريقيا :
يروي هيرودوت، أن مجموعة من الشباب الليبيين هم أول من أقتحم مجاهل أفريقيا وقد سجل هيرودوت في كتابه رحلة الليبين منذ 2500 سنة الى أفريقيا المشاهدات التي شاهدوها أنذاك.
أول لحن يرتفع في دنيا الموسيقى :
يقول إيثناوس في كتابه (( مائدة الفلاسفة )) أن الناى المصنوع من شجرة اللوتس التي تنمو في ليبيا كان يطلق عليها الناي الليبي، وقد ذكر إيثناوس أن سيرتيس الليبي هو أول من اكتشف فن العزف على الناي.

الزي الليبيى :

يذكر العالم (( سمث كاج بيركت )) في كتابه ((ممرات الحضارة )) الذى طبع عام 1965 ، أن اللباس الروماني منقول اي انه اخد عن اللباس اليوناني القديم . وأن اليونانيين نقلوا العباءة أو الجرد عن الليبيين القدماء ، أي الجرد الذى يلبسه الليبيون الأن عمره يناهز 2500 سنة .
النساء الليبيات: : :

ذكر هيرودوت في كتابه ، أن توب ودرع أثينا قد نقلهم الاغريق عن النساء الليبيات . وهذا الثوب الذي نقله اليونانيون عن الليبيات هو عبارة عن ثوب طويل يلف الجسم ويضم الكتفيين تتمنطق المرأة ببقيته وتلفه حول وسطها .
ليبيا والفلاسفة :
أختلف مؤرخون الفلسفة ، وقد ذكر يوجين في كتابه (( حياة مشاهير الفلاسفة )) . أن الفلسفة نشأت في الشرق وليس في اليونان ، وذكر أن أشهر الفلاسفة القدماء ليبيا يدعى (( أطلس )) وذكر (( ديوجين)) أن محاورات أفلاطون المشهورة كانت اقتباسا من ارستبوس القوريني اللليبي.
الليبيون القدماء والموضة :
يبدو أن شغف الليبين بالموضة قديم قدم التاريخ ، فقد ذكر هيرودوت أن قبيلة ليبية كان أهلها مميزين بقص شعرهم، فقد كانوا يطلقون شعورهم على شكل (عرف الديك) ، وذلك بحلق الرأس ، واطلاق الشعر على وسط الرأس . واخرون يربون شعورههم على الجانب الايمن من الرأس ويحلقون الذى على الجانب الأيسر .
الليبيون والعربات :
يقول هيرودوت . أن الاغريق تعلموا من الليبين جر العربات وهي
طريقة يتقنها الليبيون ويقومون بربط أربعة خيول لتجر عربة واحدة

أول قائد دخل الي بريطانيا واحتلها ليبي (سيتيموس سيفيروس)في العهد الروماني طبعا...

اول ملك يحكم مصر وهو مش مصري وقلب علي الفراعنة ودخل العربة الي تجرها الخيول هو ليبي(شيشنق)...

أول مكان يطلع منه الشعير ويمشي لاوروبا (طبعا الشعير اصله شمال افريقيا) من ليبيا..
المهم لو قعدت نحكي للصبح مش حتكمل القائمة عشان هكي اللي عنده حاجة زيادة يضيفها ميتحشمش